FÉLAGSFUNDUR – AUKAAÐALFUNDUR BÚMANNA HSF.
Félagsfundur og aukaaðalfundur Búmanna hsf. verður haldinn mánudaginn 24. nóvember 2025 og hefst fundurinn kl. 14.00 í HvammI á Hótel Reykjavík Grand við Sigtún 28 í Reykjavík (aðalfundarstaður) og verður streymt þaðan í Múlaberg á Hótel KEA, Hafnarstræti 87-89 á Akureyri (fjarfundarstaður).
Í samræmi við 13. gr. samþykkta Búmanna hsf. verður félagsmönnum sem búa í meira en 200 km. akstursfjarlægð frá tilgreindum aðalfundarstað gefinn kostur á að mæta og taka þátt í aðalfundinum í gegnum fjarfundarbúnað á fjarfundarstað.
Nánar vísast til reglna um rafræna þátttöku á félagsfundum Búmanna hsf. sem eru aðgengilegar á vef Búmanna www.bumenn.is.
Innskráning á fundinn á aðalfundarstað og fjarfundarstað hefst kl. 13.00 og eru félagsmenn hvattir til að mæta tímanlega til skráningar. Fundurinn er opinn öllum félagsmönnum Búmanna hsf. og hafa þeir málfrelsi, tillögurétt og atkvæðisrétt á fundinum. Hver félagsmaður má fara með umboð frá einum öðrum félagsmanni.
Dagskrá félagsfundar og aukaaðalfundar Búmanna hsf. er sem hér segir:
- Setning fundar og kosning fundarstjóra og fundarritara.
- Samningur um að húsnæðissamvinnufélagið Elliði hsf. í Þorlákshöfn sameinist Búmönnum hsf. lagður fyrir félagsfund Búmanna hsf. til samþykktar. Gögn vegna samrunans verða aðgengileg félagsmönnum Búmanna hsf. á skrifstofu félagsins að Lágmúla 7, 5. hæð, 108 Reykjavík frá og með 17. nóvember 2025.
Umræður og atkvæðagreiðsla.
3. Tillaga um nýtt ákvæði í samþykktir Búmanna hsf.
Á grundvelli samrunasamnings Búmanna hsf. og Elliða hsf. samþykkti stjórn Búmanna hsf., á stjórnarfundi sem haldinn var þann 23. október 2025, að gera tillögu að eftirfarandi nýju ákvæði í samþykktir Búmanna hsf. sem verði 34. gr. þeirra:
„34. gr.
Samruni.
Við samruna Elliða hsf. í Búmenn hsf. skulu félagsaðilar þess fyrrnefnda eiga rétt á að verða félagsaðilar í því síðarnefnda og fá félagsnúmer í því félagi í sömu röð og þeir höfðu í Elliða hsf.
Þeir fyrrum félagsaðilar Elliða hsf. sem verða félagsaðilar í Búmönnum hsf. í tengslum við samruna félaganna og eru ekki núverandi búseturéttarhafar í íbúðum við Mánabraut 1-16 og Sunnubraut 1-8, Þorlákshöfn (hér eftir Elliðaíbúðir) skulu njóta forkaupsréttar til kaupa á búseturétti í Elliðaíbúðum til ársloka 2030 í samræmi við félagsnúmeraröð þeirra eins og hún var í félagaskrá Elliða hsf. þannig að lægra númer gengur fyrir hærra ef á reynir. Forkaupsréttur þessi verður einungis virkur bjóði viðkomandi félagsmaður í búseturétt í Elliðaíbúðum.
Í samræmi við skipulagsskilmála Elliðaíbúða skal einungis 60 ára eða eldri vera heimilt að eignast búseturétt í þeim íbúðum.
Um ráðstöfun, kaup og sölu búseturéttar í Elliðaíbúðum gilda að öðru leyti ákvæði samþykkta Búmanna hsf. og söluskilmálar sem settir eru á grundvelli þeirra.“
Umræður og atkvæðagreiðsla.
- Fundarslit
